Back

સાપુતારા ખાતે મોન્સુન ફેસ્ટીવલ આયોજન અંગે બેઠક યોજાઈ.

વાત્સલ્ય ન્યૂઝ ડાંગ - મદન વૈષ્ણવ

૧૧ ઓગષ્ટ થી ૧૦ સપ્ટેમ્બર સુધી યોજાનાર ફેસ્ટીવલ સુચારૂ રીતે પાર પડે તે માટે જિલ્લાનું વહીવટી તંત્ર કટીબધ્ધ..

આહવાઃ તાઃ ૧૧ઃ રાજ્યના એકમાત્ર ગિરિમથક સાપુતારા ખાતે સમગ્ર વર્ષ દરમિયાન સહેલાણીઓના આકર્ષણ માટે રાજ્યના પ્રવાસન વિભાગ અને જિલ્લા વહીવટી તંત્રના સહિયારા પ્રયાસથી જુદા જુદા ફેસ્ટિવલ નું આયોજન કરવામાં આવે છે. આગામી તા.૧૧/૦૮/૨૦૧૯ થી તા.૧૦/૦૯/૨૦૧૯ દરમિયાન મોન્સુન ફેસ્ટીવલનું આયોજન કરવામાં આવ્યું છે. જિલ્લા કલેકટરશ્રી એન.કે.ડામોર ના અધ્યક્ષ સ્થાને હોટેલ એસોશિયેશન અને જિલ્લાના ઉચ્ચ અધિકારીઓની આજરોજ જિલ્લા સેવાસદન,આહવા ખાતે બેઠક યોજાઇ હતી.

જિલ્લા કલેકટરશ્રી એન.કે.ડામોરે તમામ ઉચ્ચ અધિકારીઓને જણાવ્યું હતું કે મોન્સુન ફેસ્ટીવલ દરમિયાન નાનામાં નાની બાબતોની કાળજી લેવાય અને તકેદારીના ભાગરૂપે કોઇપણ જાતની નિષ્કાળજી ચલાવી લેવામાં આવશે નહીં. સહેલાણીઓને પુરતી સુવિધા મળે તે માટે વહીવટી તંત્ર કટીબધ્ધ છે. સાપુતારાના ફરવાલાયક સ્થળો ગવર્નર હીલ,બોટીંગ,પાર્કીંગ,સનસેટ પોઇન્ટ,સનરાઈઝ પોઈન્ટ,ગાર્ડન વિગેરે તમામ સ્થળોએ સબંધિત અધિકારીઓએ મુલાકાત લઇ ચોકસાઈ પૂર્વક કામગીરી ચકાસવાની રહેશે. મેડિકલ ટીમ ઉપસ્થિત રહે અને માર્ગ મકાન સ્ટેટ તેમજ નેશનલ હાઈવે ઓથોરિટીના અધિકારીઓ પ્રવાસીઓને અગવડ ન પડે તે માટે સુચારૂ આયોજન કરે એ જરૂરી છે.

જિલ્લા પોલીસ અધિક્ષક શ્રી શ્વેતા શ્રીમાળીએ જણાવ્યું હતું કે મોન્સુન ફેસ્ટીવલ દરમિયાન ટ્રાફિક ન થાય તે માટે હોમગાર્ડની વિશેષ ટીમ તૈનાત કરાશે તેમજ સ્થાનિક પોલીસ સબ ઈન્સ્પેકટરશ્રીના માર્ગદર્શન હેઠળ સ્ટાફને યોગ્ય તાલીમ આપી સુસજ્જ કરાશે.

હોટેલ એસોશિયેશન પ્રમુખશ્રી ઉપેન્દ્રભાઈ પટેલે સૂચન કર્યું હતું કે મુખ્ય કાર્યક્રમના સ્થળે તૈયાર કરવામાં આવતા ડોમને કારણે બોટીંગ તરફ થોડી મુશ્કેલી સર્જાય છે જેથી બીજા સ્થળોનું પણ નિરીક્ષણ કરીને સ્થળ બદલી શકાય તો પ્રવાસીઓને અનુラકૂળ રહેશે.

સાંસ્કૃતિક કાર્યક્રમના આયોજન સંદર્ભે જિલ્લા રમત-ગમત અધિકારીએ સ્થાનિક કલાકારોને રોજગારી મળે તેમજ કલાકારોની વ્યવસ્થા સારી રીતે થાય તે જોવાનું રહેશે.

આજરોજ યોજાયેલ આ બેઠકમાં નિવાસી અધિક કલેકટરશ્રી ટી.કે.ડામોર,નાયબ જિલ્લા વિકાસ અધિકારીશ્રી ડી.આર.અસારી,પ્રાંત અધિકારીશ્રી કાજલ ગામીત, જિલ્લા ગ્રામ વિકાસ અધિકારીશ્રી જે.ડી.પટેલ,ટુરિઝમ મેનેજર સાપુતારા રાજુભાઈ ભોંસલે, આહવા,સુબીર અને વધઈના તાલુકા વિકાસ અધિકારીશ્રીઓ સહિત તમામ અધિકારીઓ ઉપસ્થિત રહયા હતા.

આહવા તાલુકાનાં પળે પળના સમાચાર આપના મોબાઇલ પર મેળવવા નીચેના ગ્રૂપમાં એડ થવા વિનંતી..