Back

આહવા ખાતે નમામિ દેવી નર્મદે મહોત્સવની ધામધુમથી ઉજવણી.

મદન વૈષ્ણવ
વઘઇ ડાંગ

પર્યાવરણની જાળવણી માટે અનુરોધ કરતા - ગુજરાત વિધાનસભાના નાયબ મુખ્ય દંડક શ્રી આર.સી.પટેલ

આહવા.તા.૧૭ઃ ડાંગ જિલ્લાના મુખ્ય મથક આહવા (તળાવ) ખાતે આજરોજ ગુજરાત વિધાનસભાના નાયબ મુખ્ય દંડકશ્રી આર.સી.પટેલના અધ્યક્ષ સ્થાને જિલ્લા પંચાયત પ્રમુખ શ્રીમતિ બીબીબેન ચૌધરી,તાલુકા પ્રમુખ શ્રી નરેશભાઈ ગવળી સહિત મહાનુભાવોની ઉપસ્થિતિમાં નમામિ દેવી નર્મદે મહોત્સવની ધામધુમથી ઉજવણી કરવામાં આવી હતી.

વિધાનસભાના નાયબ મુખ્ય દંડક શ્રી આર.સી.પટેલે કુદરતી સંપત્ત્િાથી ભરપૂર ડાંગના જિલ્લાના લોકોને અભિનંદન આપતા જણાવ્યું હતું કે આપણાં ગુજરાતની સરહદે સુંદર જંગલોની સાચવણી અહીંના લોકોએ કરી છે. આજે ગ્લોબલ વોર્મિંગ સામે આપણે જનજાગૃતિથી પર્યાવરણ બચાવવા પ્રયાસ કરી રહ્યા છે. દેશના વડાપ્રધાનશ્રી નરેન્દ્રભાઈ મોદીનો આજે જન્મ દિવસ છે. અને નર્મદા નદી ઉપર આવેલો સરદાર સરોવર ડેમ પણ ૧૩૮ મીટર છલકાઇ ઉઠયો છે જે આપણાં સૌના માટે આનંદનો દિવસ છે. નર્મદાના નીર આજે સૌરાષ્ટ્ર તેમજ કચ્છમાં પહોંચ્યા છે અને પાણીની સમસ્યા દુર થઇ છે. હવે અહી઼ સ્થાયી થયેલા લોકો પણ પાછા માદરે વતન પ્રયાણ કરી રહયા છે.

કલેકટર શ્રી એન.કે.ડામોરે નમામિ દેવી નર્મદે મહોત્સવની ઉજવણી પ્રસંગે ઉદ્‍બોધન કર્યું હતું કે હાલમાં ડાંગ જિલ્લાની તમામ ૧૬ સીટો ઉપર નર્મદા મહોત્સવની ઉજવણી થઇ રહી છે. સ્વચ્છતા અભિયાન,રક્તદાન શિબિર જેવા કાર્યક્રમોનું આયોજન કરવામાં આવ્યું છે. નર્મદાના પાણીથી ખેતીવાડી,જંગલો તેમજ પર્યાવરણને ખૂબ જ ફાયદો થશે. જુદા જુદા સેકટરો દ્વારા ઉઘોગો નો વિકાસ થશે તેમજ મંદીના માહોલ વચ્ચે ગુજરાતને રોજગારીની તકો વધશે.

નર્મદે મહોત્સવ દરમિયાન મહાત્મા ગાંધી ઉઘાનથી શાળા કોલેજના બાળકો,નેહરૂ યવા કેન્દ્રના મંડળો,પદાધિકારીઓ દ્વારા રેલી ના માધ્યમથી સ્વચ્છતાનો સંદેશ નગરજનોને અપાયો હતો.ડાંગ જિલ્લાને પ્લાસ્ટિક મુક્ત કરવાના પ્લે કાર્ડ રેલીના બાળકો દ્વારા રજુ કરાયા હતા. આ પ્રસંગે મહાનુભાવોએ આહવા તળાવનું પૂંજન કરી મહાઆરતી દ્વારા જળઅભિષેક કર્યો હતો.સ.મા.શાળા,એ.મો.રે.સ્કુલ આહવા,કે.વી.કે.ની વિઘાર્થીનીઓએ સાંસ્કૃતિક કૃતિઓ રજુ કરી હતી. આરોગ્ય વિભાગ દ્વારા મહાનુભાવો ના હસ્તે મા અમૃતમ કાર્ડ, આયુષમાન ભારત તેમજ ડાંગના સગર્ભા બહેનોને મચ્છરદાનીનું વિતરણ કરાયું હતું. કાર્યક્રમને અંતે મહાનુભાવો સહિત તમામ લોકોએ સ્વચ્છતાના શપથ લઇ ગામ,નગર,જિલ્લો સ્વચ્છ રાખવા કટીબધ્ધતા વ્યક્ત કરી હતી. તેમજ મહાનુભાવો દ્વારા વૃક્ષારોપાણ કરાયું હતું.

આ પ્રસંગે જિલ્લા વિકાસ અધિકારીશ્રી એચ.કે.વઢવાણિયા,નિવાસી અધિક કલેકટરશ્રી ટી.કે.ડામોર, પ્રાંત અધિકારી શ્રીમતિ કાજલ ગામીત,જિલ્લા શિક્ષણાધિકારી શ્રી એમ.સી.ભુસારા,કાર્યપાલક ઈજનેરશ્રી જે.કે.પટેલ, જી.એ.પટેલ,મદદનીશ વન સંરક્ષકશ્રી જીનલ ભટ્ટ,પી.પી.સ્વામી,હેતલદીદી,આહવા સરપંચ શ્રીમતિ રેખાબેન પટેલ,સામાજીક કાર્યકર ગાંડાભાઈ પટેલ,માજી જિ.પ્રમુખ બાબુરાવ ચૌર્યા સહિત અધિકારીઓ,પદાધિકારીઓ અને તમામ નગરજનો મોટી સંખ્યામાં ઉપસ્થિત રહ્યા હતા.

આહવા તાલુકાનાં પળે પળના સમાચાર આપના મોબાઇલ પર મેળવવા નીચેના ગ્રૂપમાં એડ થવા વિનંતી..